عمى عبد العزيز ...الله يرحمك
احلى شى فى العايلة الكبار...
تحب تقعد معاهم وتسمع سوالفهم..تحس بالحنين لكويت الاصيلة ..
اهل الكويت الى بنوها وسووها ورعوها ايام الفقر والضنك
تحس فيهم بالطيبة والسكينة والعزة..عزة نفس بدون كبر او غرور..
عمى عبدالعزيز...نسخة من الوالد المرحوم النوخذة سعود الله يرحمه
توفى ( بابا سعود ) واحنا صغار حيل..
عمى عبد العزيز توفى الاسبوع الى طاف..مو عمى لكن نسميه عمى.. قبل جم سنة توفى اخوه الاصغر مبارك..كان عمره بالخمسينات..عمى عبدالعزيز فوق الثمانينات بشوى الله يرحمه.
رحت العزا...سلمت عليهم ...قعدت شوى بالدوانية وطلعت بره مع جيل الشباب..
العادة نقعد بره والكبار هم يصفون داخل..
يضيق خلقى لى مات واحد جبير من كبار العايلة تاريخ يروح معاه...عمر يندفن وياه..
والعايلة بعد الكبير تتفرق ...الكبير يجمع العايلة مثل مايقولون والى ماعنده كبير يدور له كبير...
الدنيا فيها اشياء تضيق الخلق..تشوف الكبار يروحون واحد ورا الثانى
..كل عيد تلقى العايلة تنقص واحد وتقول الله يرحمه فلان كان العام معانا..
يالله ارحمنا برحمتك...
والله يخلى لنا من تبقى ويرحم من توفى
ويخلى لكم كباركم وصغاركم..
الحمدلله على كل حال
11 Comments:
مرحبا
وناسة انا اول وحده ((عادي هبل))
الله يرحم عمك ويرحم اموات المسلمين
دايما اقول لخالتي الكبيره انها هي بركة البيت لانها اكبر وحده من الحريم ولابوي بعد لانه كبير بيتنا وبصراحه كل الكبار فيهم البركه والله يحفظهم لنا ويخليهم
تحياتي
صج نسيت عندي سؤال
اكو احد يسمي نفسه يوكن؟؟
لهدرجه متعقد من المتن؟
الله يرحمهم ان شا الله والله كرمك صح من جذي الواحد يصور معاهم ويسجل حجيهم عشانن يستفيد ويستانس
بس فعلا روحتهم تحز بالنفس و الخاطر ...من جذي استفيددواا مني قبل لا انقرض :(
هلا بالمجنونة والله عاد انا احب الميانيين :)
وبعدين يوكن مو لانى متين يالكحيانة..:)
يوكن سيارة جيب تشوفينها بالشارع
عتيجة
لوووووووووول
الحين انا يكون ضايق خلقى وانتى تنكتين :)
عاد مسكى روحج هذا بوست حزين :)
الله يرحمه
ويرزقه الجنه ان شاء الله
الله يرحمهم برحمته ياربي
والحمدلله هذي الدنيا .. ناس ترووح وناس تيي !؟
سبحانك ياربي كل شي له حكمة
وعسى ربي يجمعنا فيهم بجنته يااااارب وجميع المسلمين
الله يرحمه
لكبير بركة سبحان الله ..
عظم الله اجرك
<<
عتيجووه
عن المفاول
اولا:
بعيد الشر عن عتيجه اسمله عليج ورده الفال لعذالي
ثانيا :
انا كحيانه
انا إلي
أنا يلي
أنا يعني
كحيانه
اهيء اهيء اهيء
ما اقول الا الله يسامحك يال اليوكن اوه قصدي يالمتين
الله يرحمه ويرحمنا .. الدوام لله سبحانه
الله يرحمهم ويغمد روحهم الجنه
صج اهمه اساس البيت والبيت اللى فيه كبير بركه
صج استانس لمن اقعد مع يدتي او يدي ويقعدون يسولفون عن زمان اول تحس ايام حلوه وزمن غير زمنا هذا
بس هذا مرجعنا كلنا من التراب انخلقنا وللتراب بنرد كلنا
والعايله تنقص بالكبار وينولدون الصغار ولزم نحفظ كلام الكبار علشان نقوله حق الجيل اليديد
Post a Comment
<< Home