عمى عبد العزيز ...الله يرحمك

احلى شى فى العايلة الكبار...

تحب تقعد معاهم وتسمع سوالفهم..تحس بالحنين لكويت الاصيلة ..

اهل الكويت الى بنوها وسووها ورعوها ايام الفقر والضنك

تحس فيهم بالطيبة والسكينة والعزة..عزة نفس بدون كبر او غرور..

عمى عبدالعزيز...نسخة من الوالد المرحوم النوخذة سعود الله يرحمه

توفى ( بابا سعود ) واحنا صغار حيل..

عمى عبد العزيز توفى الاسبوع الى طاف..مو عمى لكن نسميه عمى.. قبل جم سنة توفى اخوه الاصغر مبارك..كان عمره بالخمسينات..عمى عبدالعزيز فوق الثمانينات بشوى الله يرحمه.

رحت العزا...سلمت عليهم ...قعدت شوى بالدوانية وطلعت بره مع جيل الشباب..

العادة نقعد بره والكبار هم يصفون داخل..

يضيق خلقى لى مات واحد جبير من كبار العايلة تاريخ يروح معاه...عمر يندفن وياه..

والعايلة بعد الكبير تتفرق ...الكبير يجمع العايلة مثل مايقولون والى ماعنده كبير يدور له كبير...

الدنيا فيها اشياء تضيق الخلق..تشوف الكبار يروحون واحد ورا الثانى

..كل عيد تلقى العايلة تنقص واحد وتقول الله يرحمه فلان كان العام معانا..

يالله ارحمنا برحمتك...

والله يخلى لنا من تبقى ويرحم من توفى

ويخلى لكم كباركم وصغاركم..

الحمدلله على كل حال

باجر دوام...لااااااا...

باجر دوام ...احباااااط وغلققة

بسرعة خلصت العطلة شنو

مامدانا نسوى شى ..

مااالىىى خلق اداااوم ابىى عطلة طويلة مااشبع من العطلة

..

ودى اصرخخ.. من قلبب

لااااا للدوااام ...

اليهال كاسرين خاطرى بطونهم تعورهم ودهم يسهرون نفس الايام الى طافت

..مساكين قبل العشا نايمين..لوووولل

والله اختى شخصية ماشاء الله عليها

لووووووول

الله يعيد عليكم الايام الحلوة

الشى الوحيد الخايس

منتخب المرض منتخب الكويت

قمة الفشل والربادة والله ضيقوا خلقى بالعطلة

كنا بالشاليه مستانسين ماكدرنا الا هالخمة الى بالمنتخب والاتحاد

حتى اليمن ...صج انكم رداية

شفتوا منتخب الكويت الدايخ

اليمن الى مالها اى تاريخ رياضى ولاتمثل شى فى كرة القدم بغوا يغلبونا

لاعبينا مو كفو الاتحاد مو كفو ماوراهم الا قصة الويه والفشلة

لكن من تنادى

ناس ويها مغسول ( ...) وانتو بكرامة

الله يعينا ماراح تخلص دورة الخليج الا ناشف دمنا ومرتفع ضغطنا

لواهيب مايعرفون الا تسريحة شعرهم وسهرات ولعب بلى ستيشن..

ابتسامة موظفة بنك برقان

حسابى الغالى احم احم فى بيت التمويل..

بيت التمويل على فكرة اخيس بنك فى التعامل مع الناس

لكنى الحمدلله قابل اتعامل معاه لان البنوك الثانية ربوية

فانا راضى اتعامل مع ناس دايخة لكن فلوسى ومعاملاتى ان شاء الله بعيدة عن الربا والحرام

..

شريت تذكرة سفر من الجزيرة حق دبى بعد جم يوم ان شاء الله

اضطريت اعدل موعد السفرة قالولى طيران الجزيرة المحترمين روح ادفع الفرق عند بنك برقان..ليش برقان ماادرى المهم انا رحت

يوم السبت بنك العديلية والا مسكر...

الاحد رحت والا البنك فى بنيان وتجديد وناقلين الموظفين الدور الثانى

دخلت البنك ..

الموظفين اشكالهم غير

شلون غير

الشباب باسجين وكلهم شكل واحد ..

حتى كلهم نفس الطول ...لووووووووووووول

خذيت رقم من الاخ المحترم حارس الارقام فى البنك

لما يا دورى

عند اخت موظفة

الصراحة استقبالها راقى ونفسيتها محترمة

ومن كثر ما تبوسمت بويهى بغيت اعطيها فلوسى حقها وامشى

لوووووول

صج صج..

يقولون البنوك تلزم موظفينها بالابتسامة والمعاملة العدلة مع العملاء

بس الطريقة هذة مع انها حلوة لكن اعتقد تحرج الموظفات مع المراجعين

يعنى يمكن اى واحد اثول يفهم ابتسامة البنت وطيبة نفسها شى ثانى

واعتقد هعذا شى وارد حيل فى الكويت

ولا اذا صار المراجع عفلنقى من هالمصبنة او عقيدى مو شايف خير

انا عجبتنى المعاملة لكنى لو شنو مااحول حسابى لبرقان وهم اعتقد

موحلوة شغلة البنات بالبنوك

المهم دفعت الفلوس ورديت البيت..

والصج الصج

مانسيت ابتسامة موظفة برقان

كانت ابتسامة ذهبية

الله يوفقها ويستر عليها

.

ياخوات ياعزيزات ارحمو اخوانكم من قرقة التلفونات

فى عايلتنا وبيتنا المحترم انا وسط شقيقات فوقى وتحتى..

وبحكم العلاقة اليومية والمنزلية فان اكثر شى يبط جبدى اذا قاموا يتكلمون بالتلفون

اول شى وايد من سوالفهن مالها داعى بالمرة وثانى شى يكلمون بعض نص ساعة وساعة ويكونون توهم رادين من طلعة او عزيمة

ثالث شى اذا مايحشون ما تحلى السوالف عندهن...

وانزين انا شعلاقتى بالموضوع..علاقتى انهم لما يتكلمون يكونون قاعدين بالصالة واحنا نطالع التلفزيون اما فيلم او مباراة ..وماتحلى الحنة الا اذا اندمجت مع المباراة فشوفوا شنو السوالف المهمة بينهم...

اتصلت مرة اختى تقول حق الثانية ( بسرعة حطيه على قناة امبى سى 2 شوفو احلام شنو لابسه ..)

ومرة اتصلت فيها تقولها... شرايج البس جوتى كعب والا جوتى عادى وانتو بالكرامة

..

وطبعا سوالف الدوام اليومية وشقالت عبير وشردت منيا وشسوت منور وشسوت حنانو( ماتحبها طبعا )..وعرفت اسامى ربعهم كلهم وخواتهم وامهاتهم وريايلييهم وكل شى عندنا بالبيت

واما البلوة اذا كانوا معزومين على عرس طبعا قبل لايروحون باسبوع وهم ماعندهم سالفة الا شريتى بذلة وديتيها الخياط صلحتيها رديتها المحل عندج شال واى طقم تلبسين وين الفرير باخذ مال فلانة والجوتى لونه مو ماشى والصالون مافيه حجز ومواعيده زحمة والفلبينية الى تصبغ الشعر مسافرة واللبنانية ماااحبها تشرب زقاير ..هذا قبل العرس..

بعد العرس..ططااطططا طططاااطط ازعاااااجججججج

شفتى فلانة وام فلانة شفتى خالتها هذى عمتها لبس العروس مكياج العروس ويه العروس شعر العروس العشا والحلو والتقديم والاثاث وام العروس وخوات العروس والمعرس جيكر والمعرس قصير والمعرس جنه حول والمعرس مشخوط والى رقصت ماتعرف ترقص والدىجى والى يغنى يابو القصار لا يابو الردهان لا يابو وحدة ماادرى شسمها..حجى وااايد شنو يثبتون كل شى وادق التفاصيل حتى لبس الخدامات بالبيت ومسفط السياسيير وليتات المطبخ والشفاط مال الحمااامم لوووول شى مو طبيييعععىىى سوالف عقب العرس باسبوووع

..

انا عندى تسعين رقم بتلفونى ثلاث اربعاهم مااتصل فيهم الا بالسنة حسنة ..وربعى الى اروح وارد معاهم ماادق عليهم الا اذا عندنا شى بنسويه وكلمة ورد غطاها تعالى امرك انطرنى تلعب كرة تروح السوق نروح العزا وفاماللاه..اما هذرة ساعات بالتلفون والله شى مو طبيييعى

المفروض يصرفون لى بدل اذن عن هالقرقة الى عندنا بالبيييت

:)

والله يعين المتزوجين على قرقة حريمهم

لووووول

****

يا خوات ياعزيزاات ارحموا اخوانكم من قرقة التلفوناااتتت

بس مع هذا الله يخليهم ويوفقهم ويخلى عيالهم

فلاش حلو

قوة شلونكم اليوم دفا عكس امس برررد:)

هذا فلاش حلو حق الى يحبون حركات الكمبيوتر

ماادرى هو تعليمى والا كلكجى

المهم شوفوه وان شاء الله يعجبكم

***********

http://flash.abunawaf.com/2006/12/animation1.html

*****************

منو شاف برنامج ام بى سى المسابقات مال قرداحى..؟؟ قبل جم يوم الى مسابقات بين مجموعات من دول عربية وخليجية...

ويحضرون معاهم ممثلين..

كانت منى شداد حاضرة... بس مغنى مصرى ولبنانى حطوا عليها ناجروها علبوا ضحك وضرب تحت الحزام

مسكينة كسرت خاطرى

عاد منى شداد دمها خفيف

لووول

ذكرتنى بالشريب بزة

صج ضبطت دور الخبلة

:)

هل انت انت..هل انتى انتى ..؟؟

العنوان معقد ماعليه:)

ساعات افكر شنو شخصية البلوقيين

يعنى اذا دخلت بلوق وقريت موضوع مكتوب..افكر هل شخصية الكاتب او الكاتبة فعلا مثل ما كتب وعبر عن نفسه..

ساعات الواحد يحاول يصير عقلانى او عاطفى او صادق او ذرب لكن فى الواقع يكون شخصية ثانية

ساعات يكتب كلام يعجز يعبر عنه فى الواقع ويواريه خلف قلبه وعقله..

ياترى ..هل انت فى البلوق كما تكون فى الواقع..

وهل انتى فى البلوق كما تكونين فى الواقع..

سؤال اتمنى تجاوبونى عليه..

وعلشان اكون صادق معاكم ابدا اول واحد اجاوب..

بكل صدق واسف انا ( احيانا ) فى البلوق غير عنى مع اهلى وربعى

..

يعنى انا..مو انا..

؟؟

تفاهة مالها حدود

اليوم بجريدة الوطن حاطين خبر شكبره

ان حليمة بولند بتروح الحج..

سخاافة مالها حدود..تفاهة وبياااخة

شنو يعنى بتروح الحج

بتحج حقنا والا حق ربها

ليش شاغلينا بامور سفاهات مذيعة ..

....

خير يعنى حجت والا قعدت عند امها شنسوى

نطق طيران

نكت نون

والله مسخرة ..

بس شنقول

هذى الديرة انترست من هالاشكال المهمة الخطيرة

....

بتروح الحج

...

بدران كان يستاهلها

جائزة الاتحاد الاسيوى كان يستاهلها بدر المطوع او الشلهوب

عطوها لاعب قطرى مغمور محد يعرفه

حتى الكرة فيها واسطات ونحاسة

من ردى اتحادنا

المفروض يقلبونها عليهم

صدق الشاعر لى قال

ان لم تكن ذئبا بالت عليك الثعالب

القروض..طاحت والا ماطاحت

مجلس الامة بيقعدون الاثنين 27/11/2006 حق القروض

تهقون يسوونها ويطيحون القروض والا الحكومة تخرب السالفة عليهم..؟؟

راى شخصيا موضوع القروض حووسة بعرف الى مااخذ قرض شنو راح يعوضونه..؟؟

واحد مقترض عشرة الاف دينا ر وواحد نص مليون يطيحون عليهم..شسسسالفة

الظلم شلون صاير

والا الحكومة والنواب خمة..

الله يعينا عليهم ..

حرامممم اسقاط القروض على ناس وحرمان ناس ثانيينن

..؟؟ شراايكم

جالس لحالى ...

********

جالس لحالى أدور كلمة تسليك

احترت اى نوع الكلام اهديك

اهديك عيونى تحرسك وتداريك

والا اهديك روحى الا كل همها تلاقيك

شفاف وحلو وربى تجنن معانيك

باى شى اوصفك وكل الغلا فيك

لى قريت هالرسالة منى تراها تجيك

ابيك تعرف انى اعزك..واموت فيك

*********

الى سواه صح أو غلط

واحد من الاهل قرر يتزوج..

قال حق اهله ان راح اختار الى ابيها..

تفاجاوا بعد مدة ان يبى يتقدم لبنت كويتية

مطلقة

عندها اولاد

اكبر منه

طبعا امه ينت وقالت له لو شنو ماتتزوجها انت عزوبى واول زواج لك

وتوك ماكملت ثلاثين سنة شفيك خلصوا بنات الناس

صاحبنا مارد عليهم

حط ريل بالارض وريل بالسما اتزوجها يعنى اتزوجها ...

بعد مدة تزوجها واهله ماكانوا راضيين وايد بس مااقدروا يمنعونه

الريال الحين اموره طيبة الحمدلله

عنده عيال من زوجته وعايش معاها بسلام

لكن شرايكم بالى سواه..

فى مشكلة اذا تزوج وحده اكبر منه وعندها عيال من زواجها السابق

انا حزتها كان رايى انه مايتزوجها لكن طبعا احتفظت فيه لنفسى لان الولد ماامون عليه وايد

الحين اقول الله يوفقه ..